  Swapn jhare phool se, meet chubhe shool se
lut gaye shringaar sabhi, baag ke babool se
aur ham khade khade, bahaar dekhate rahe
kaaravaan guzar gayaa, gubaar dekhate rahe
kaaravaan guzar gayaa, gubaar dekhate rahe
Aankh bhi khuli na thi ki haaya dhoop dhal gaee
paanv jab talaq uthe ki zindagi fisal gaee
paat paat jhad gaye ki shaakh shaakh jal gaee
chaah to nikal saki na par umar nikal gayi
par umar nikal gayi
geet ashk ban gaye, swapn ho dafan gaye
saath ke sabhi diye, dhuaan pahan-pahan gaye
aur ham jhuke-jhuke, mod par ruke-ruke
umr ke chadhaav kaa utaar dekhate rahe,
kaaravaan guzar..
Kyaa shabaab thaa ki phool phool pyaar kar uthaa
kyaa kamaal thaa ki dekh aayinaa sihar uthaa
is taraf zameen aur aasamaan udhar uthaa
thaamakar jigar uthaa ki jo milaa nazar uthaa
jo milaa nazar uthaa
par tabhi yahaan magar, aisi kuchh hawaa chali
lut gayi kali kali ki ghut gayi gali gali
aur ham lute-lutTe, waqt se pitet-pite
saans ki sharaab kaa khumaar dekhate rahe
kaaravaan guzar..
Haath the mile ke zulf chaand ki sanwaar doon
ho.nth the khule ke har bahaar ko pukaar loon
dard thaa diyaa gayaa ke har dukhi ko pyaar doon
aur saans yun ke swarg, bhoomi par utaar doon
bhoomi par utaar doon
ho sakaa na kuchh magar, shaam ban gayi sahar
wo uthi lahar ke Deh gaye kile bikhar bikhar
aur ham dare dare, neer nain mein bhare
odh kar kafan pade mazaar dekhate rahe,
kaaravaan guzar..
Maang bhar chali ke ek jab nayi nayi kiran
dholakein dhunak utheen thumak uthe charan charan
shor mach gayaa ke lo chali dulhan chali dulhan
gaanv sab umad padaa, bahak uthe nayan nayan
bahak uthe nayan nayan
par tabhi zahar bhari gaaz ek wah giri
punchh gayaa sindoor taar taar huyi choonari
aur ham ajaan se, door ke makaan se
paalaki liye huye kahaar dekhate rahe
kaaravaan guzar
Swapan jhare phool se, meet chubhe shool se
lut gaye shringaar sabhi baag ke babool se
aur ham khade khade bahaar dekhate rahe
kaaravaan guzar gaya gubbaar dekhate rahe
kaaravaan guzar gaya gubbaar dekhate rahe
kaaravaan guzar gaya gubbaar dekhate rahe
-- Contributed by raviraj
-- March 04, 2004 |
