par tum tak jo na pahunch paaye, woh geet kitne abhaage hain
ab un geeton ka kya hoga, jo isi aas mein jaage hain

ek baar hamein dekho pad lo, ek baar hamein gaa do aa kar
kya bhool hui jo chale gaye, humko yun pyaasa tarsa kar

sargam kahti hai tham jaao, ab to parwaaz nahi hogi
aawaaz bahut si aayengi, par yeh aawaaz nahi hogi

tum jitne mithe the, utna hi mitha gaate the
taarif koi jab karta tha, Allah ki daya batate the

jab tak dharti par jeevan hai, suraj chaand sitare hain
sangeet geet ki mahfil hai, gaane wale banjaare hain

tumko kaise hum bhoolenge, har pal yaaden tadpayengi
aahoon mein dil yeh doobega, aankhein aansoon chhalkayengi

abhi july 10 ke din, tumne jo geet mera gaaya
us waqt kahan un shabdoon ka, yeh arth samajh mein tha aaya

hosh ke sahil pe mujhko, ab na aane dijiye
aaj to bas mastiyoon mein, doob jaane dijiye

tumne jo gaaya sahi kiya, tumko to hosh nahin aaya
par hum kaise sah paayenge, jo dukh tumko khokar paaya

Bhagwaan niyati yeh kaisi hai, aakhir yeh kya mazboori hai
itna asahaaye banana kya, insaan ko yahan jaroori hai

teri marzi ka patjhad yeh, phir se ek gulshan jala gaya
teri marzi se phir jag mein, insaan bechara chhala gaya